इजुकी नराई लागैलि
इजुकी नराई लागैलि, म्यार आँसू घुरी आल
मेरि मैतै ह्यूँ चड़ी, तु मैंकैं बोत्यूहूँ आये!
बाबुकी बाटुइ लागैलि म्यर मन खणि खा्ल
मेरि मैतै घुघुति तु मन पत्यूहूँ आये!
इजुकी लाड़िली चेलि सितियै रै जूँल कै
म्यर मैतौक कफुवा तु मैकैं जगूँहूँ आये!
याद आल धुर जगांव गौं, गाड़, गोठ, पा्न
मेरि मैतै चौंरि बाछी तु मैंकैं भेटुहूँ आये!
रात दिन आँसू म्यार छ्वै जा फुटनै र्वाल
मेरि मैतै ओ बिराई तु दुख ब्यौंमूणहूँ आये!
ड्ान का्न बजी रई मैतौ दिस नि देखीन
मेरि मैतै पवना तु पंख लगूँहूँ आये!
इकलि कुड़ि मेरि नैं मुख् बुलाणी क्वे
मेरि मैते घिनौड़ी क्वीड़ काथ् कूणहूँ आये!
धुपरी घाम में मैं भ्योव कभाड़ हुँल
मेरि मैतै छ्वै नौई तु गइ भिजूँहूँ आये!
नैं हा्ड़ भिड़ देखी, नैं बण धुर जगोंव
मैरि मैतै सैण बाटी तु बाटि बतूँहूँ आये!
नौ थान गोरू भैंस, सौ धान बका्र म्या्र
मेरि मैतै मुसै पोथी घा-पात काटुहूँ आये।
भदौ मानण, चुटण असौज सिमेरण है रूँ
मेरि मैतै किरमोई तु ब्वज सारहूँ आये!
रंगिल चैत में दगड़ी किलकारि मारा्ल
मेरि मैतै हिनौई तु मैंकैं झुलूहूँ आये!
इजू हातै छोई खूँल, बाबै हातै चोइ पैरूँल
मेरि मैतै ओ ज्यूनी तु भिटोइ दिणहुँ आये!
